Donnerstag, 28. Januar 2009

Höt hei mer am Morge am 4i us dä Fädere müese. Mer si met dr ganze High School of Polokwane anes „Independent Schools Athletics Meeting“ gange. Do hei sich die beschte Athlete vo diverse Schuele gmässe. Noch 2.5 Stund Busfahrt si mer z Polokwane acho. Unmittelbar näb üsem Sportstadion befindet sich eis vo dä Fuessballstadie för d Weltmeischterschaft 2010. Wie dr gsäit, eschs no vou im Bau. A däm Sporttag si aui athletische Diszipline doregfüehrt worde. Witsprung, Hochsprung, Diskusswärfe, Chugelestosse, Sperrwärfe, 100m, 200m, 400m, 800m, 1500m, 3000m, 5000m, 100m Hürde, 110m Hürde, 400m Hürde und Stafette. Es esch auso e riese Event gsi!!! Vo dä einzelne Schuele hei jewils nor es par Sportler chöne starte. Dr räscht vo dä Klasse esch of dr Tribüni gsässe und het Stemmig gmacht. Es esch abartig gsi! Unvorstöubar, wie die Sportler agfüret worde si. Mer eschs vorcho as wärs „Weltklasse Zürich“. Aui Schuele hei ganzi Schlachtrüef mit Choreogrfie und teilwis sogar Cheerleaders vorgfüehrt. Es esch es riese Fäscht gsi. Üsi Schuel het d Trommele metgno und mächtig dr Takt agää. Dr Stefan und eg hei au öppe die Mau chli chöne mettrömmele. Öbrigens esch öisi Schuel dr Gaschtgäber gsi. Mer hei auso die ganzi Feschtwirtschaft und so müese füehre. Eg be met em Stefan und no zwe andere am Igangstor postiert gsi. Mer hei dörfe Itrettstickets und Programm verchouffe. Öppe am Nomittag am 2 esch das Meeting fertig gsi. Mer si so gäg die haubi 6i zobe deheime acho. Het grad no glängt, zom i Pool z gummpe.

Mittwoch, 28. Januar 2009

Höt si mer am Morge chorz as Staff-Meeting gange. Die Konferenz findet jede Morge am haubi 9i statt. Dr Head Master git aui wichtige Infos dore. Nocher hei mer üs klangheimlich verzoge. Mer hei nämlich för höt e Trip planet gha. Mer si met em Auto of Graskop abe gfahre und denn e spezielli Route met Ussichtspünkt und söschtige Sehenswördigkeite zrug gfahre. Leider esch s Wätter ned grad so dr Hammer gsi. Es het aber trozdäm riese Spass gmacht.

Wär glaubt emmer no a Adam und Eva und esch gäge d Evolutionstheorie?

Dienstag, 27. Januar 2009

D Klasse hei jede Morge am 7ni Sport oder Kulturprogramm. Mer si höt met go Bike. Aschliessend hani mi no dä Trömmler agschlosse. Esch absolut cool, was die Kids för Rhytme droff hei. Eg ha dr Klang äuä ned onbedengt verbesseret J.
Dr Stefan het letscht Woche zwe Klasse öber Forschigsmethodik unterrichtet. Noch eme Theorieblock hei d Schüler es Stahlwatte-Experiment dörfe beobachte und Hypothesene formuliere. Eg ha die glichi Thematik mit Elektrizität vertüft. D Kids hei a aune Lektione sehr Freud gha. Au för üs esch es vou cool gsi. Wenn mer es Englischs Wort ned gwösst hei, hei üs d Schüler emmer ghoufe. S esch e super Erfahrig gsi!
Am Obe esch no e ganzi Familie Impalas vor üsem Pool uftaucht. So härzig!

Wo esch dr Fähler, schribet Sie jetzt?!