Donnerstag, 15. Januar 2009

Höt het offiziell d Schueu agfange. Wöu mer geschter i dr Nacht fluetartigi Rägefäu gha hei, si 25 vo de 230 SchülerInne ned itroffe. Döu Flüss si aschinend met em Auto ned öberquerbar gsi (T.I.A!). D SchülerInne hei sich aui vorem Schulegebäude müese sammle. Klass näbe Klass. S het usgseh wie e HV-Formation im Militär. Nachdäm si gschtaflet i Saal ine gloffe si, esch losgange met ere Predigt vom Head-Master, gfougt vom „Vater unser“ wo aui gmeinsam ufgseit hei. Nocher hei mer es bar Könnelern-Spöu (sogenannti Ice-breakers) gmacht, chli met dä Kids plauderet und s Schuelgländ met ne agluegt. Die hei riese Freud a dr Schwiiz (Schoggi, Skifahre usw.), si aber öberrascht gsi, wie wenig grossi Tier mer hei. Ou, ond eg müesi unbedengt i Krüger Park „The big 5“ go aluege. Elephant, Löi, Gepard, Böffu und Nashorn. –Mache mer!!!
Am spote Nomittag hei mer dr Autovermietigs-lady no en Azahlig muse mache. Sie het üs verzöut, wie si vo es bar „Maximalpigmentierte“ J verarscht worde sig. Die heige mit modernschter Technik ehres ganze Guethabe of dr Bankcharte abghobe. Der eint heig sich ergendwie no us Security usgä. Was wott me do säge? –T.I.A!!!

Mittwoch, 14. Januar 2009

Am 9.00 hei mer e Spaziergang ume See gmacht, wo grad be üsem Hus esch. So am 11.00 si d Chinder itroffe, wo do a dr „Southerncross school“ id Schueu göi und glichzitig im „boarding house“ wohne. Dr Head-Master het d Eltere und Chinder öber die wichtigschte Ziel und Regle informiert. Dr Stefan und eg hei nome dört müese teil nä, nocher hei mer üs e grösseri Stadt usgsuecht und si met em Auto chli go shoppe. Mer hei öppe 80km müese fahre. Zerscht si üs ofere 120er Strecki zwee Wöud-Söii vor dr Schnore doregloffe, spöter es ganzes Rudel mit Affe (T.I.A!). Im Shoppingcenter esch üs sofort ufgfaue, dass mer zemmlich die einzige Wisse si. Esch cooli Erfahrig gsi, vo aune beobachtet z wärde J.
Höt Obe esch e Familie mit ere hübsche Tochter zo üs is Hus cho öbernachte. Si hei ehre Sohn a dr Schueu abglade und ziei morn witer. Wie dr of dä Fötteli gsäit, hei si es riese Nachtässe gmacht. Au dr Head-Master und sini Frau si iglade gsi. Mer hei e ganz spezielli Afrikanischi Grillier-Art könne glehrt (bray). Ajo, s Hus esch no haub usnander gheit J (T.I.A!)

Dienstag, 13. Januar 2009

Höt hei mer s erscht mau chli früener usem Bett müese. Mer hei am 8i i dr Schueu anere Lehrekonferänz teil gno. Esch cool gsi zom luege, was do unde so besproche wird und wie so e sitzig ablauft. Am 10ni hei mer chorz üses Auto chöne go abhole. E Toyota Corolla! ..und weder zrog ad Setzig. Am 13.00 hei mer e haub stond Mettag gha. Tische si keini vorhande gsi. Die meischte si ofe Bode ghocket, oder hei ofem Stuehl gässe. Am haubi 4i hei mer denn chöne abzieh. Grossichauf esch jetz agschtande. Eg be s erscht mau met em ne links gschtürete Auto gfahre. Läck, esch scho komisch wenn dr Blinker bem Schibewöscher esch und umgekehrt. Ou s Schaute met dr linke Hand esch rächt spzeziell. Und be jedere chrüzig müese mer ame weder 3 mau öberlegge, of welere Sitä mer müese abbiege. Of abglägene Strosse beni plötzlich weder rechts unterwägs gsi. Chont guet J
Am Obe hei mer üsi erschti Shisha mit Doppu-Öpfu gschtopfet. Esch ned z verachte gsi. Vo a bis z nüt kratzet. Well done.

Montag, 12. Januar 2009

Eg werde mi in Zuekonft weder chli chörzer fasse.
Höt si mer of die 9i id Schueu gange. Mer hei z Fuess öppe 5 Minute. D Schueu esch nämmlich au i däm abgschperrte Berich, wo üses Hus stoht. Met em Head-Master hei mer dr Verlauf vo de nöchschte Täg agluegt und e Rundgang dor s ganze Areal gmacht. Die Schueu esch krass anderscht, as mer üs das gwöhnt si. (T.I.A!) Lueget eifach d Föteli aa, denn heit dr en Idruck. Bauarbeite si no i vouem Gang! Witer hei mer no gluegt, dass mer ab em Zischtig es Auto hei.
Am Nomi si mer usem abgsperrte Berich is Dorf före gloffe. Jetz het s erschte mau d Sonne so richtig abebrätscht. Es esch öppis öber 30°C gsi. Chauffloschtig wie mer si, hei mer jede Lade und jedes Lädeli abtschegget. Plötzlich…aus dem nichts…vou is Aug gschtoche…e Shisha J …“weisch wie chillig, zobe dosse uf dr Verande oder im Pool?“... „jo vou…loooos…chauffe!“ –Vouer Freud hei mer üs die härzigi Shisha kauft und chum hei mer zahlt gha, het d Verchäufferin gseit, si heig de leider kei Chole meh. Mann, mann, het üs grad agschisse. Aber easy, morn esch au no e Tag!
Wo mer noch Studelanger Shoppingtour ändlich weder deheime gsi si, hei mer gmerkt, wie rot üsi beide Äcke si! Juhui, dr erschti Sonnebrand. Wöu mer usgseh hei wie zwe Tomate, hei mer grad Spaghetti met Tomatesosse kochet. Nochem ässe hei mer üs no es zerrisserli gönnt und si i Pool go bade. Zom Schloss hei mer no met em Feldstecher d Umgäbig beobachtet und jenschti Antilope gsichtet.

Sonntag, 11. Januar 2009

Ich habe mich entschlossen, dr Blog of Schwiizerdütsch z schribe.
Mer si am 10i ganz gmüetlich ufgschtande, hei öbbis z Morge gno und si nach Hoedspruit gfahre. Dr Stefan und eg si huere gschpannt gsi, was mer för en Unterkunft wärde aträffe und wie üses Dorf so usgseht. Wo mer noch öppe 2 Stund z Hoedspruit acho si, hei mer schnäu mau gmerkt, dass das Dorf es chlises Käffli esch. Mer hei met üsem Head-Master Anthony (Ant) vo dr Southerncross school e Träffpunkt abgmacht. Wies ned anderscht chönnt si, hei au mer ines abgriglets, bewachts Gebiet müese/dörfe. (T.I.A!) Vou gschpannt si mer met em Ant zo üsere Unterkunft gfahre. Herr und Frau Gibbs (Lehrpersone a dr Southerncross school) hei bereits of üs gwartet. Sie hei üs härzlich empfange und üs d Zimmer und dr Räschte vom Hus zeigt. Eg ha gmeint eg spinne, woni mi Berich agluegt ha! Hammer!!!! Ou dr Stefan esch usem Stuune ned usecho. „Met dem Ehepäärli wärde mers do i däm Hus guet ha, hei mer dänkt.“ Doch denn hets mer fascht dr Nuggi use ghoue, woni tschegget ha, dass mer elei i däm Feriehus wohne! Es ghört öbrigens innere holländische Familie. Mer hei es Video dräit, dass der chöit luege, wieso mer vo däm Huus so schwärme!

Link chont no. (üs fäut es kabu)

D Frau Gibbs het üs denn no of nes par wichtigi Sache ufmerksam gmacht: Osse am Hus nie barfuess omelauffe, es het hochgiftigi Skorpions! Dorom au emmer d Schueh uschlopfe, bevor dr drii schlüfet! Der müesst wüsse, der sit do im Bush und do hets unzähligi giftigi Schlange. Dorom kei Ässe dossse loo, das lockt nämmlich Müüs, Frösch, Schlange, Affe und anderi Tier aa! Grundsätzlich chöit der öberau go lauffe, eifach emmer luege, wo der häne trampet. (T.I.A!)
Und ganz wichtig: Es het letscht Woche wildi Hünd ome gha. Wenn dr dene begägnet sofort of ne Baum chlättere oder so lut chräie, wie dr chöit. Jo ned derfo sekle, „otherwise they will kill you!“ ---eg be mer vor cho, wie imene Traum…

Gäge obe esch üs dr Ant met sinnere Frau cho abhole, het üs die wichtigschte Läde, Pubs und Take-aways vo Hoedspruit zeigt und üs weder hei gfahre. Aschliessend hani met em Stefan e Fläsche Wii dötscht und d Ussicht of dr Veranda gnosse! Langsam eschs donku worde und glichzittig esch d Natur rund ums Hus zum Läbe erwacht. Abartig wie lut das do cha si!!! Hundert verschiedeni Grüsch! Affe, Grille, Vögu, Üle, Frösch, usw.
So zobe am 11i hei mer üs no e DVD ine zoge. Öppe am haubi 1 am Morge esch plötzlich alles schwarz worde. Fernseh, Liecht, alles tot. Stromusfau! Ou das ghört derzue (T.I.A!) Mer hei dr Sicherigschaschte gseucht, aber do esch aues guet gsi. Jo guet, näme mer haut e Latärne zom is Bett go.
Woni denn ändlich im Näscht gläge be, hani weder aui die Grüsch vo dosse ghört. Es esch so spannend und lut gsi, dass i fascht nüt gschloffe ha. (T.I.A!)