Samstag, 7. Februar

Am Morge am 8i hei mer üses Troumhus verloo und si 2h of Nelspruit abe gfahre. Dört hei mer üsi vier andere Kollege troffe und si witeri 3.5h of Johannesburg a Flughafe gfahre. Ab i Flüger of Kapstadt! Dört hei mer üs zwöi neui Autos gmietet. Üsi Unterkunft esch metz i dr Longstreet. Esch chli verglichbar met dr Langstross in Züri. Pub näbe Pub, Restaurant a Restaurant, Klubs, Dealer und Prostituierti und Bettler si presänt. Esch no krass, wievöu Chinder ständig chöme cho bettle . Die gsehsch jetz immer. Sogar am Morge früeh am haubi 4i hani die cheibe usem Fenschter beobachtet. Wenn zom Tüfu schloffe die mau???
Mer si zobe öbbis go ässe, hei ei, zwe Drinks gno und si go „penne“. Esch esch e riese Bruchbude. E ha met em Stefan es chlises Bett müese teile. Mer hei üs ned mau chöne dräie. Und s Fenschter hei mer natürlich grad of d Partystross use gha. E riese Lärm bis weiss ned wenn. Am 4i beni emmer no wach gsi. Metlerwile het d Polizei chli för Ornig gsorget. Die hei aber met ehrne Megafohn au huere Lärm gmacht.