Sonntag, 18. Januar

Morgenstund hat Gold im Mund! Wäu s Wätter no schön möud gsi esch, si mer 1 Stond go Tschogge. Resultat: Vöu Schweiss und Sonnebrand a dä Schultere.
Bem putze söt me ned z vöu Gwaut awände, gwössi Bääse möges nämlich ned verlide…
Am Nomittag si mer met em Sohn vonere Lehrerin, und no es par andere neue Kollege ane chline Flusss go Fische. För üs esch es s erschti Mau gsi. Vou abgange! 5 Uswürf hani vougas i de Bäum versänkt. 2 Mau hei mer müese d Schnuer doreschnide. Denn esch s Beschte cho: Dr eint vo dä Kids het e Fisch a dr Angle gha. Är het mer grüeft, dasi dr Fisch cha a Land zieh. Eg ha gmeint, dr Fisch sig no rächt wit osse und es git e riese Fight. Dorom hani mini ganzi Chraft zäme gno und wie wöud a dr Angle dräit. Wöu dr Fisch aber praktisch scho vor mine Füess gsi esch, hets ne voues Rohr usem Wasser gschleuderet. Ä resch diräkt uf d Spitze vo dr Angle gfloge und dört blibe Stecke J. Die ganzi Fischerei het riese Spass gmacht. Am Obe si mer no zom Ässe iglade worde. Curry-Riis. Esch ebefaus super gsi!

Samstag, 17. Januar

Noch dem asträngende Obe vo geschter hani höt chli länger wele schloffe. Am 6i beni aber scho verwachet und vou fit gsi. Eg be 2 h i Pool go hocke und nocher nomau chli go ligge. Genau den esch dr Stefan ufgschtande. Är het sich es Toschtbrötli gmacht, hets dosse ofe Tisch gleit und esch schnäu ine go s Nutella hole. Won är weder use cho esch, esch keis Brötli me ome gsi. Jetz het doch tatsächlich sone fräche Aff im rechtige Momänt zuegriffe. Die Cheibe könne nüt.
Am Nomittag si mer ine Reptilie Park. Schlange, Krokodil, Salamander usw. go aluege. Wöu höt Samschtig esch hei mer natürlich au i Usgang wele. Velecht esch jo chli meh los as geschter. –Vergiss es. Es esch absolut tote Hose gsi. S einzige wo mer no gmacht hei, esch e Rundi Billard spiele und met em Schläger es Glas abrume J. Ah jo, mer hätte fascht no s dopplete zahlt, hei denn aber tschegget, dass do unde es Gummibärli haut eifach einiges böuiger esch as i dr schöne Schwiiz (4 Fr.).

Freitag, 16. Januar

Höt hei mers ändlich mau gschafft, is Internet z cho und es bar Sache ufe z lade. Mer hei mau en andere Heiwäg vo dr Schueu wöue usprobiere. Esch ned so super gsi, dr Stefan esch im Schlamm blibe stecke ;-)
Am Obe hei mer es riese Grillfäscht met aune Teachers gha. Üs esch empfole worde, gnue z trinke met z nää (Bier). Das hei mer denn au gmacht. Mer hei auso brötlet, neui Lüt könne glehrt und es bar Bierli zwitscheret. Nochem Ässe esch dr Wodka und s Red-Bull zom Zug cho. Das esch üs spöter no zom Verhängnis worde. So am haubi 10i si mer scho liecht agheiteret zrog is Hus gwanderet. Dört hei mer e Shisha entfacht und Cointreau sauer drunke. Plötzlich si mer beidi rächt barat gsi. Es esch ned lang gange, do het d Shisha müese dra glaube. E sone Tröte het si ofe Bode gschosse. (dörft 3 Mau rote wär J )
Jetz hei mer no rechtig loscht becho, i Usgang z go. Mer si dore stockdunkli Busch gloffe und hei die zwöi einzige Pubs i dr nöchere Umgäbig abklaperet. Ungloublich, es esch absolut nüt los gsi. S einte Pub het grad zue gmacht, s andere esch praktisch lär gsi. Si mer haut hei go Kornflakes ässe.

Donnerstag, 15. Januar 2009

Höt het offiziell d Schueu agfange. Wöu mer geschter i dr Nacht fluetartigi Rägefäu gha hei, si 25 vo de 230 SchülerInne ned itroffe. Döu Flüss si aschinend met em Auto ned öberquerbar gsi (T.I.A!). D SchülerInne hei sich aui vorem Schulegebäude müese sammle. Klass näbe Klass. S het usgseh wie e HV-Formation im Militär. Nachdäm si gschtaflet i Saal ine gloffe si, esch losgange met ere Predigt vom Head-Master, gfougt vom „Vater unser“ wo aui gmeinsam ufgseit hei. Nocher hei mer es bar Könnelern-Spöu (sogenannti Ice-breakers) gmacht, chli met dä Kids plauderet und s Schuelgländ met ne agluegt. Die hei riese Freud a dr Schwiiz (Schoggi, Skifahre usw.), si aber öberrascht gsi, wie wenig grossi Tier mer hei. Ou, ond eg müesi unbedengt i Krüger Park „The big 5“ go aluege. Elephant, Löi, Gepard, Böffu und Nashorn. –Mache mer!!!
Am spote Nomittag hei mer dr Autovermietigs-lady no en Azahlig muse mache. Sie het üs verzöut, wie si vo es bar „Maximalpigmentierte“ J verarscht worde sig. Die heige mit modernschter Technik ehres ganze Guethabe of dr Bankcharte abghobe. Der eint heig sich ergendwie no us Security usgä. Was wott me do säge? –T.I.A!!!