Montag, 26. Januar 2009

D Woche het be dr Primarschuel mit ere Reed vom Head Master agfange. Är het e Gschicht vorgläse und über wichtige Sache informiert. Es Gebätt het au ned dörfe fähle. D Chinder hei rechtig schön zueglost.
Höt hei mer enere Lehrerin ghoufe e Fitness-Checks dore z füehre. Dr Stefan het sini Kids vo Baum zo Baum lo sekle, eg ha mini d Stäge uf und ab gjagt. Am spötere Morge si mer s Fach „bush lore“ go bsueche. Do gods houptsächlich drom, lisig dore Busch z wandere und möglichscht vöu Tier und Pflanze z gseh. Mer si a üsere Brugg verbi cho. Si esch metlerwile weder wasserfrei, het aber stark glitte. I dr Metti esch si kollabiert.

Samstag/Sonntag, 24./25. Januar 2009

Höt si mer met em Auto uf Nelspruit abe gfahre (2h) zo dr Mélika und em Chrigi. Esch weder mau e spektakuläri Fahrt gsi. Zerscht esch fascht d Verschalig a dr Front vom Auto abgheit, nocher esch im 120er no sone blödi Chueh öber d Stross ghöterlet. Aus dem Nichts si mer ines Näbuloch cho.
Au dr Florian und dr Andrea si do häne cho. Mer si s erscht mau aui 6 zäme go z Nacht ässe. Eg ha es ganzes Huehn verdrückt. Hammer fein gsi! Koschtet hets 85 Rand = 12 Franke! Nochem Ässe si mer z Nelspruit ine Club weder mau so richtig go fäschte. Mer hei d Tanzflächi grockt J. Öbernachtet hei mer grad be dr Mélika und em Chrigi.
Am Sonntig si mer met ere Lehrerin vo dr Mélika ehrere Schuel und no es bar andere Type i Botanischi Garte vo Nelspruit. Aschliessend si mer no zom Ässe iglade worde. Esch scho erstunlich, wie gaschtfründlich und offe die Lüt do in Süd-Afrika si.

Sporttag

Am Fritig het denn dä riese Sporttag statt gfunde. Met Spitzetemperature vo 38 Grad, esch das ned grad e Zuckerschläck gsi för d Schüler und au för üs Häufer. Die wenige Schatteplätz wos gha het, si sehr beliebt gsi.

Eg ha öbrigens die Woche no en Augeentzündig igfange. Vo dr Schueu-Chrankeschwöschter hani Tröpfli för mini fürrote Auge becho. Die hei absolut nüt brocht. Esch ebe nome zom befüechte gsi. Wöui au i dr Schwiz scho so Entzündige gha ha, hani gwösst, dasi öbis starchs bruche, wo nome e Augearzt cha verschribe. Spersadex heisst das Medikament. Eg has eifach mau probiert und be id Apothek go froge, ob si das Medi hei. Si het zwar zerscht chli zögeret und gseit, es sig rezeptfplichtig, hets mer aber denn tatsächlich verchauft (T.I.A!)

Ah jo, eg muess mau no säge, was das (T.I.A!) eigentlich söu. Dr Kevin hets usegfunde. Es esch vom Föum „Blood Diamant“ und heisst: „This is Afrika!“

Montag, 19. Januar bis Freitag 23. Januar 2009

Die Woche esch es losgange met Schuelstonde bsueche. Mer hei zuegluegt, wie do unde Unterrichtet wird und wie sich d Schüeler so verhaute. Üs esch sofort ufgfaue, wie diszipliniert die ganzi Schuel ablauft. D Stunde säuber si vom Inhalt här ned grad so dr Hit gsi. Si eigentlich meh so chli improvisierti Lektione gsi, wöu d Lehrpersone noni aui Schuelbüecher hei. Lieferigsproblem (T.I.A!). S Mittagässe a dr Schueu si mer au bar mau go probiere. àmer choche weder säuber J Es get nämlich praktisch nie Fleisch und au söscht eschs ned beruschend. Osserdäm hei mer meh as gnue Zit zom säuber choche. Mer hei nämlich üse eigeti Studeplan zämegschtöut. Vou nochem Motto: „Take it easy“ - chöits euch jo vorstöue. Und emmer wenn mer grad kei Bock me hei, göi mer eifach weder hei i Pool go ligge oder so. Merkt und stört absolut niemer. Mer si völlig flexibu.

Am Mittwoch hei d SchülerInne före Sporttag am Fritig chöne trainiere. Mer si met dä Bussli ines abgschperrts Militärgebiet gange (Drakensig), wos riese Sportplätz het. Eg be bim Hochsprung go mithäufe. D Schüler hei ofem füechte Rase müese alaufe. Esch fascht chli kriminell gsi. Es Wunder, dass sich niemer dr Fuess broche het. Ou jo, Wöudsöii hei sich au no ofem Gländ ometriebe. Hei äuä au wele metmache.

Mer hei no ganz vöu anderi Tier gseh i dä letschte Tage. Einisch esch e ganzi Horte Kudus (Antilope) um üses Hus gschliche. Impalas si au ständig do. Üse chli See hinde am Hus esch zunere Attraktion worde. Wägem Hochwasser (s het sit em Dezember bis jetz, so vöu Wasser obe abe grägnet, wie söscht imene ganze Johr) het es Nilpferd dr Wäg i üse See gfunde. Mer söue zobe spot besser ned go omelaufe, Nilpferd si nämmlich die gfährlichschte Tier in ganz Afrika. Si fordere die meischte Todesopfer. Hät nie dänkt, dass es Nilpferd mit 50km/h cha sekle. Of jede Fau si i dä letschte Täg öppe 50 Autos dohäne gfahre und hei s Nilpferd beobachtet. (eg gsehs vom Pool us J)

I üsere Garage hei mer zwöi geili Bikes entdeckt. Jetzt göi mer emmer öppe chli go umekurve. Esch vou cool, was do aues gsehsch. Of üsere erschte Tour hei mer zerscht Zebras gfunde, spöter het üs e Giraff dr Wäg versperrt (leider hani kei Kamera derbi gha). Of dr zwöite Tour hei mer plötzlich huere Schiss gha. Of üsem Heiwäg het üs en Autofahrer gseit, mer söue ufpasse, witer vore sige 9 Wild-Dogs. Die zerlegge e Antilope i 5 Minute i Einzuteili. Mer si vorsichtig witergfahre, bis mer si vo wittem gseh hei. Si huere schöni Tier! Mer hei aber ned verbi dröut. Zom Glöck si hinter üs zwöi Autos cho. Mer hei dene langsam chöne hinde noche fahre. Phüüüüüü. Ha rächt s Härzchlopfe gha, woni näb dene Hünd verbi gschliche be. Am Endi vo dere Velotour si mer weder öber die bekannti Brogg gfahre, wo emmer e chli unter Wasser esch. Mer hei Schwein gha, dass mer no hei cho si. Die Brogg esch nämlich die einzigi Verbindig zo üs öbere. 5 Minute nochdäm mer däne gsi si, esch dr Wasserspiegu rasant agschtige. Of beide Sitä hei sich d Autos gschtauet, wöu si nömm dröber hei chöne.

Gruss aus der Schweiz

Zwischendurch einmal ein Gruss aus der verschneiten Schweiz (Foto nicht ganz aktuell, aber als Gegensatz sicher interessant ;)Eine Weihnachtserinnerung soll natürlich nicht fehlen.

Ganz herzliche Grüsse und alles Gute. Deine Familie.